 |
| ਗ੍ਰੀਸ ਸਥਿਤ ਭਾਰਤੀ ਦੂਤਾਵਾਸ ਵਿੱਚ 77ਵੇਂ ਗਣਤੰਤਰ ਦਿਵਸ ਮੌਕੇ ਰਾਜਦੂਤ ਰੁਦ੍ਰੇਂਦਰ ਟੰਡਨ, ਨਾਲ ਗ੍ਰੀਸ ਵਿੱਚ ਰਹਿੰਦੇ ਭਾਰਤੀ ਪ੍ਰਵਾਸੀ ਭਾਈਚਾਰੇ ਦੇ ਮੈਂਬਰ ਅਤੇ ਦੂਤਾਵਾਸ ਦੇ ਅਧਿਕਾਰੀ। (ਜ਼ੀਸ਼ਾਨ) |
ਕਾਦੀਆਂ, 27 ਜਨਵਰੀ (ਜ਼ੀਸ਼ਾਨ)- ਗ੍ਰੀਸ ਦੀ ਰਾਜਧਾਨੀ ਐਥਨਜ਼ ਵਿੱਚ ਭਾਰਤ ਦੀ ਗੂੰਜ ਉਸ ਵੇਲੇ ਸੁਣਾਈ ਦਿੱਤੀ ਜਦੋਂ ਭਾਰਤੀ ਦੂਤਾਵਾਸ ਵਿੱਚ 77ਵੇਂ ਗਣਤੰਤਰ ਦਿਵਸ ਆਯੋਜਿਤ ਕੀਤਾ ਗਿਆ। ਸਮਾਗਮ ਦੀ ਅਗਵਾਈ ਰਾਜਦੂਤ ਰੁਦ੍ਰੇਂਦਰ ਟੰਡਨ ਨੇ ਕੀਤੀ, ਜਿਸ ਵਿੱਚ ਭਾਰਤੀ ਭਾਈਚਾਰੇ, ਭਾਰਤ ਦੇ ਮਿੱਤਰਾਂ ਅਤੇ ਦੂਤਾਵਾਸ ਦੇ ਅਧਿਕਾਰੀਆਂ ਨੇ ਵੱਡੀ ਗਿਣਤੀ ਵਿੱਚ ਭਾਗ ਲਿਆ।
ਸਮਾਰੋਹ ਦੀ ਸ਼ੁਰੂਆਤ ਰਾਜਦੂਤ ਟੰਡਨ ਵੱਲੋਂ ਰਾਸ਼ਟਰੀ ਝੰਡਾ ਲਹਿਰਾਉਣ ਅਤੇ ਰਾਸ਼ਟ੍ਰਗਾਨ ਨਾਲ ਹੋਈ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਮਾਨਯੋਗ ਰਾਸ਼ਟਰਪਤੀ ਦਾ ਦੇਸ਼ ਲਈ ਸੰਦੇਸ਼ ਪੜ੍ਹ ਕੇ ਸੁਣਾਇਆ, ਜਿਸ ਵਿੱਚ ਭਾਰਤ ਦੀ ਯਾਤਰਾ ਅਤੇ ਵਿਸ਼ਵ ਪੱਧਰ 'ਤੇ ਉਸਦੀ ਵੱਧਦੀ ਭੂਮਿਕਾ ਉਜਾਗਰ ਕੀਤੀ ਗਈ। ਇਸ ਮੌਕੇ ਪਹਿਲੇ ਸਕੱਤਰ (ਵਪਾਰ ਅਤੇ ਸਭਿਆਚਾਰ) ਸ਼੍ਰੀ ਬੀਰੇੰਦਰ ਸਿੰਘ ਰਾਵਤ ਸਮੇਤ ਦੂਤਾਵਾਸ ਦੇ ਹੋਰ ਅਧਿਕਾਰੀ ਵੀ ਹਾਜ਼ਰ ਰਹੇ।
ਇਸ ਸਾਲ ਦੇ ਸਮਾਗਮ ਦੀ ਖ਼ਾਸ ਖਿੱਚ ਗ੍ਰੀਸ ਵਿੱਚ ਰਹਿੰਦੇ ਪੰਜਾਬ ਦੇ ਕਾਦੀਆਂ ਨਾਲ ਸੰਬੰਧਤ ਭਾਰਤੀ ਪ੍ਰਵਾਸੀਆਂ ਦੀ ਸਰਗਰਮ ਭਾਗੀਦਾਰੀ ਰਹੀ। ਇਸ ਸਮੂਹ ਵਿੱਚ ਮੁਬਾਰਕ ਅਹਿਮਦ ਵਰੈਚ, ਹਰਬੰਸ ਲਾਲ ਸਹਗਲ, ਸਤਨਾਮ ਸਿੰਘ, ਇਜ਼ਹਾਨ ਵਰੈਚ, ਹੈਪੀ ਕਾਦੀਆਂ, ਗੱਜਨ ਸਿੰਘ ਅਤੇ ਮਸ਼ੂਦ ਅਹਿਮਦ ਵਰੈਚ ਸ਼ਾਮਲ ਸਨ।
ਸਮਾਗਮ ਦੌਰਾਨ ਕਾਦੀਆਂ ਨਾਲ ਜੁੜੇ ਪ੍ਰਵਾਸੀ ਮੈਂਬਰਾਂ ਨੂੰ ਰਾਜਦੂਤ ਰੁਦ੍ਰੇਂਦਰ ਟੰਡਨ ਨਾਲ ਮੁਲਾਕਾਤ ਦਾ ਮੌਕਾ ਵੀ ਮਿਲਿਆ, ਜਿੱਥੇ ਉਨ੍ਹਾਂ ਨੇ ਆਪਣੇ ਵਿਚਾਰ ਅਤੇ ਭਾਵਨਾਵਾਂ ਸਾਂਝੀਆਂ ਕੀਤੀਆਂ। ਇਹ ਮੁਲਾਕਾਤ ਗ੍ਰੀਸ ਵਿੱਚ ਰਹਿੰਦੇ ਸਾਰੇ ਭਾਰਤੀਆਂ ਨਾਲ ਦੂਤਾਵਾਸ ਦੇ ਨਿਰੰਤਰ ਸੰਪਰਕ ਅਤੇ ਸਹਿਯੋਗ ਦੀ ਭਾਵਨਾ ਨੂੰ ਦਰਸਾਉਂਦੀ ਹੈ।
ਸਮਾਰੋਹ ਦਾ ਸਮਾਪਨ ਸੱਭਿਆਚਾਰਕ ਪ੍ਰੋਗਰਾਮ ਅਤੇ ਜਲਪਾਨ ਨਾਲ ਹੋਇਆ, ਜਿਸ ਨਾਲ ਸਭ ਹਾਜ਼ਰੀਨ ਵਿੱਚ ਏਕਤਾ ਅਤੇ ਸਾਂਝੀ ਵਿਰਾਸਤ ਦੀ ਭਾਵਨਾ ਹੋਰ ਮਜ਼ਬੂਤ ਹੋਈ।